O Concello de Trabada está a desenvolver esta fin de semana unha nova edición do programa “Viaxa co Concello”, que nesta ocasión ten como destino Cantabria.
A viaxe, que se celebra do 19 ao 21 de setembro, completou todas as prazas dispoñibles e conta cunha alta participación veciñal. O programa inclúe visitas a lugares emblemáticos como a Cueva El Soplao, Comillas, Santillana del Mar, Santander ou Cangas de Onís.
O alcalde de Trabada, Rubén García, destacou que “se cubriron todas as prazas ofertadas e mesmo houbo máis solicitudes que prazas dispoñibles, o que demostra a boa acollida que está a ter este programa entre a veciñanza”.
O rexedor subliñou ademais que con esta iniciativa “ofrecemos aos nosos veciños e veciñas a oportunidade de descubrir novos lugares con todas as comodidades, nun ambiente de convivencia e desfrute”.
O Concello confirma que o programa “Viaxa co Concello de Trabada” terá continuidade, con novas saídas de diferente duración a distintos destinos, tanto dentro de Galicia como fóra da comunidade autónoma.